Dili muubos sa isa ka aksidente sa karsada kada adlaw an mahitabo dire sa probinsya nan SDN an naitala nan mga awtoridad, ini an tagpaabot na impormasyon gikan sa kapulisan nan SDN Provincial Police Office o PPO
Sa impormasyon na nakuha gikan sa isa sa tigpamaba nan PPO, na si P02 Ma. Rochel Chua, na basi sa record nan Surigao del Norte PPO, nakita nila na may mga traffic o vehicular accident gajud kada adlaw sukad pa an niaging mga buyan, hilabi na sa mga lungsod nan Placer, Mainit, Tubod ug Alegria na may pinakahamok na aksidente, na nahitabo hilabi na sa mga highway nan amo na mga lungsod.
Busa nanhigusog kuman an PPO na magpahimangno sa mga motorista na maghinay-hinay sa pagbyahe, para mahilakay sa disgrasya.
Dugang pa ni Chua, na kahamokan sa mga aksidente sa karsada dire aa probinsya, amo an mga single motor, sunod isab an mga 4-wheels na mga sakyanan parehas nan pick-up ug mga SUV.
Samtang, dire sa syudad nan Surigao. An highway sa Brgy. Luna, an may pinakahamok na aksidente sukad pa an niaging mga buyan.
Busa naningkamot gajud an mga kapulisan sa PPO, na magbutang nan mga poster para magpahimangno sa mga motorista, hilabi na kay hapit na an Fiesta sa syudad, na possible hamok isab an mga tagalain lugar na mubisita dire sa syudad sakay sa ila mga sakyanan.( RadyoMaN Winston Ensomo)
