Dumalinao, Zamboanga del Sur – Patay ang magtiayon samtang samdan ang duha nila ka mga anak human gisungag sa pick-up nga gisakyan niini nga motorsiklo sa National Highway sa Barangay Paglaum sakop sa lungsod sa Dumalinao ning probinsya sa Zambaoanga del Sur.
Ang padre de pamilya nga si Anthony Daulong ang nagmaneho sa ilang gisakyan nga motorsiklo nga Honda XRM 110 color blue nga nagtangag sa plaka numero JJ-2237 sakay ang iyang misis nga si Jhoane Araya, lakip ilang mga anak nga sila si Trixie Araya, 9 anyos ug John Kenneth Araya, 7 anyos pulos lumulupyo sa Brgy. Dumagoc ning syudad sa Pagadian.
Matud ni PO2 Merlie Villamor ang imbestigador sa Dumalinao Municipal Police Station, gikan ang mga biktima sa lungsod sa Dumalinao og nagbyahe paingon sa syudad sa Pagadian apan alas 9:20 sa gabii dihang naabot sila sa Barangay Paglaum kalit silang gibangaan sa naghaguros nga Ford Ranger nga gimaneho ni Raul Famor 55 anyos, residente sa Roxas, Santa Maria Pagadian.
Gumikan sa kakusog nga impact nabagnus sa kalsada ang mga biktima og daling gidala sa ospital ang mag-tiayon aron katambalan apan pipila ka oras ang nialabay gideklara kini nga patay sa mga mananambal.
Padayon karon nga giatiman sa mga doktor ang duha ka mga menor de edad nga nakahi-agom og daghanang pangus ug samad sa lawas.
Gikustodiya na sa Dumalinao PNP ang driver sa pick-up samtang giandam ang kaso nga isang-at batok kaniya.
