Sultan Kudarat —Nagpadayon ang gihimong imbistigasyon sa kapulisan sa Tacurong City Kalabutan sa pagpamusil patay sa usa ka Barangay chairman, sa may Magsaysay Avenue, Barangay Poblacion Tacurong City alas-11:00 niadtong Sabado sa buntag.
Giila ang biktima nga si Barangay Chairman Sabutuan Magango, 49, barangay kapitan sa Barangay Sadsalan, Lambayong, Sultan Kudarat.
Subay sa inisyal nga imbistigasyon sa kapulisan nasuta nga igo rang nagtindog daplin sa kalsada ang nasangpit nga biktima dihang kalit ra kining gipusil patay sa wala mailhing suspetsado.
Paspas nga misibat ang suspek human sa pagpamusil samtang ang biktima gidala gilayon sa ospital apan gideklara kining dead on arrival.
Sa karon padayon pa sa pagpangalap ug testigo ug ebidensya ang kapulisan aron sa pagtumbok sa suspek ug motibo sa maong krimen.
