Roxas City, Capiz – Ginbawian sang kabuhi samtang ginabulong sa Roxas Memorial Provincial Hospital ang isa ka senior citizen matapos nabungguan sang angkar-angkar ukon top-down nga tricycle sa Barangay Lonoy, Roxas City.
Ginkilala ang biktima kay Manuel Fernandez, 81 anyos, residente sang Barangay Jumaguicjic, siyudad sang Roxas. Sa inisyal nga imbestigasyon sang Roxas City PNP, nagalakat sa kilid sang karsada ang biktima sang aksidente ini nga nabungguan sang tricycle nga ginamaneho sang wala makilala nga persona.
Nahibaluan nga ginsakay pa sang suspek nga driver ang biktima sa iya tricycle apang iya man ginbilin sa Barangay Lawaan, malapit sa isa ka eskwelahan antes ini nagpalagyo. Ginapahayag nga yara sa impluwensiya sang makahulubog nga ilimnon ang suspek.
Nagresponde ang Capiz Emergency Response Team (CERT) agud dal-on sa ospital si Fernandez, apang ginbawian ini sang iya kabuhi samtang ginabulong sa RMPH.
