Pagadian City – Nadugangan na usab ang ihap sa mga nakarekober sa Corona Virus Disease sa probinsya diin ang mga bag-ong naulian taga- Ramon Magsaysay ug Dinas, Zamboanga del Sur.
Nagnegatibo na sa maong kagaw ang 25 -anyos nga lalaki nga Purok 2, Legarda Uno, Dinas ug karon gibuhian na gikan sa Zamboanga del Sur Medical Center Isolation Facility.
Nakalingkawas na usab gikan sa gikahadlukan nga virus ang 29 nga lalaki nga taga Purok 1, Dipalusan, Ramon Magsaysay.
Ang duha ka pasyente nga bag-o lang gibuhian sa isolation facility pulos mga Locally Stranded Individual (LSIs) nga karon anaa na sa ilang pinuy-anan apan gipahimangnuan nga mosanong sa pito ka adlaw nga home quarantine.
Base sa datos sa Integrated Provincial Health Office (IPHO)- Zamboanga del Sur gikan sa kinatibuk-an nga 56 ka kaso sa probinsya, 55 niini ang naulian na samtang usa nalang ang kasamtangan nga gi-obserbahan sa nagkadaiyang Isolation Facility.
Bisan paman sa nagkakunhod nga kasosa covid 19 sa probinsya padayon gihapon nga nag pahimangno ang IPHO sa pagsunod sa mga guidelines ug new normal protocol ilabina sa mga returning Zambosurians, sama sa pagsuot sa face mask, paghugas kanunay sa kamot ug pag-obserbar sa social distancing.
