Davao City – Taas ang ekspektasyon sa bise mayor sa syudad sa bag-ong miyembro sa lokal nga balay-balauranan nga si Councilor Carmelo Clarion.
Sa pakighinabi kang Davao City Vice Mayor Al-ag, gipasabot niini nga dili na bag-o kang Clarion ang pagpanerbisyo gumikan nakatulo na kini ka termino isip Barangay Captain sa Mulig, Toril.
Dugang ni Al-ag, ang hagit alang kang Clarion mao ang mamahimong parte sa paghimo og mga lokal nga balaud isip kabahin sa legislative department.
“As a legislator, I am expecting nga mutrabaho gayod siya. Kung unsa iyang gihatag nga dedication sa barangay, I expect him to have that kind of dedication and hard work as part of 18th Council,” segun sa bise mayor.
Gani karon ang unang adlaw ni 3rd district Councilor Carmelo Clarion sa konseho diin nidiskurso kini atol sa Privilege Hour aron mapadayag ug madungog iyang sentimiento.
Atol sa iyang privilege speech, gipamahayag niini nga wala siya nangandoy mamahimong parte sa lokal nga asembleya apan mapasalamaton siya sa pagpili kaniya sa partido ug ni Davao City Mayor Inday Sara Duterte-Carpio isip mihulip sa kanhing pwesto ni Al-ag.
Dugang niini, dili lamang kini usa ka pribilehiyo apan usa usab ka dakung responsibilidad alang kaniya.
“Akong gidawat kining dakung responsibilidad ug pagsulay sa akong katakos. Akong seguroon nga kining pagtudlo ninyo kanako akong mabayran sa kinasing-kasing nga pagpanerbisyo sa syudad sa Davao, ilabina sa ikatulong distrito, sa pagkab-ot sa kahapsay, kalinaw ug kaharuhay.”
RadyoMaN Jason Amisola
