Davao City – Gikasubo karon ni Davao City Vice Mayor Bernard Al-ag ang pag delatar sa National Commission of Indigenous People (NCIP) sa pagpagula sa Certificate of Affirmation ngadto sa bag-ong IPMR representative nga si Bae Cherry Ann Codilla.
Atol sa nahitabong AFP-PNP Presscon, gibutyag ni Al-ag nga dili siya motuo sa gipadalang sulat sa NCIP ngadto kaniya diin sulod niini ang pagkwestiyon kang Codilla isip usa ka miyembro sa Bagobo-Klata tribe.
“Ako dili motuo ani, ni-agi na ta og validation process, giselect na nato, I think the purpose of this letter is to delay the issuance of the certificate of affirmation of the new IPMR,” segun niini.
Gisaysay ni sa bise-mayor nga human niya madawat ang sulat, gitawagan niini ang NCIP aron klarohon ang maong isyu apan matud pirme wala ang nangulo sa maong ahensiya.
Pasabot ni Al-ag, muresulta kini sa pagkadelatar sa mga angayang serbisyo nga makuha sa IP community.
Kahinumdoman nga pipila sa mga programa ni Councilor Cherry Ann Codilla, ang bag-ong IPMR, mao ang IP desk sa SPMC alang sa mga IP, libreng edukasyon ingon man libreng boarding house alang sa mga lumad nga mueskwela dinhi sa dakbayan sa Davao.
Gani nag-awhag kini sa kinatibuk-an sa unom ka tribo dinhi sa dakbayan nga undangon ang politika sa indigenous ingon man pag-awhag sa NCIP nga pag-isyu sa COA aron masugdan na gilayon ang pagpanerbisyo ngadto sa IP community karong semanaha.
RadyoMaN Jason Amisola
