Sarangani Province–Gideklara nga kampyon sa bag-uhay lang nahuman nga lima (5) ka adlaw nga Sarangani Search and Rescue Olympics kon SARlympics 2018 ang rescue team sa munisipyo sa Alabel.
Gitunol mismo ni Sarangani Provincial Disaster Risk Reduction and Management Officer Rene Punzalan ang tseke isip papremyo nikantidad og One Hundred Thousand Pesos (P100k) ngadto sa Alabel Rescue Unit gipangunahan sa ilang team leader nga si Ian Sidney Ebona.
Dili tiaw ang nahimong kumpetisyon sa SARlympics 2018 tungod kay “close to reality” ang gihatag nga scenario. Sama na lang matud pa sa landslide incident nga gikalot ang nalubong nga biktima niagi pa sila sa imburnal, ang pagtabok sa tubig-baha nga dili musangko sa tubig ang pisi nga gigamit pag-rescue, ang aksidente sa dalan nga daghan ang casualty, og ang pagsalbar sa kinabuhi sa mga anaa sa kadagatan og kasapaan. Duha (2) ka tuig nang gigunitan sa Alabel ang kampyonato tungod kay sila pud ang nidaog sa SARlympics 2017.
Walay lain kining katuyuan kundili nga mahanas pa ang kahibalo sa mga rescue team og mapakusgan ang network sa local rescuers tungod kay wala may boundary matud pa ang pagtinabangay panahon sa kalamidad og katalagman. Plano kining himuon nga open competition sunod tuig makaapil ang tanang rescue team sa tibuok Region 12. Matag tuig gagahin og pondo si Governor Steve Chiongbian Solon alang sa kini nga Sulong Kaligtasan Search and Rescue Olympics.
