El alcalde Beng Climaco-Salazar ya recomenda con el hefe del policia local Senior Supt. Neri Vincent Ignacio para man-relieve con el fuerza del policia de Ayala porel diila segun neglehencia donde ya fuede escapa el tres del diila maga prisoner del Domingo madrogada.
Asegun con Climaco, hinde tolerable el cosa ya resulta que donde claro cay y achene asegun “lapses” na lao del police officer on duty y del official quien aquel tiempo amo encargao con el mantenccion del tal oficina.
El Alcalde ya abla cay ya man-cuento ya ele con Ignacio y yah ace el su recomendaccion donde ya dale con el policia de Ayala 48 hora para fuede recuvri con el tres mga preso. Desde ayer, dos pa lang del tres escape el ya fuede recuvri el mensyonao estaccion.
Si hinde asegun fuede recuvri otraves con el mga preso, chene que hay cambia con el fuerza del presente policia na Ayala, base na recomendaccion tambien del hefe del policia local.
Presentamente, dos del tres maga detenido del Ayala Police Station quien ya escapa na celda del Domingo madrogada ya puede ya cuji otravez el pulicia na dos separao ocacion. Banda alas syete del Domingo por la noche cuando si Eric Juaton y Sapayla ya rendi na otoridad con el ayuda del su maga hermana quien ya coordina con el barangay council del Ayala y ya entrega con el policia. Enante alas 11 del aga ya puede tambien cuji con Eddie Jalalana y Salazar na barrio de Tulungatung. Suma total dos ya ahora na costodia del pulis mientras el otro uno si Ernard Villamor y Raveche ya lang esta largao este tiempo. Con el dos ya tene que pone otravez na celda mientras ta continua el embuscada con Villamor. Acordando el tres puede escapa desde na celda del Ayala Poliie Station pasando na ventilation window del Domingo madrogada. – Bhong Simbajon/RMN News
