General Santos City— Magpadayon ang alert level 4 sa dakbayan sa Gensan basi sa nasabutan sa Crisis Management Council atol sa gipahigayong peace and order council meeting.
Sumala kang Col. Adonis Bajao, Commander sa Joint Task Force Gensan nga bisan pa man ug nadakpan na ang usa sa mga suspek nga mao si Jeffrey Alonzo, nagpabilin pang gawasnon ang iyahang mga kaubanan.
Busa samtang padayon matud pa ang ginahimong imbestigasyon, mas maayong magpabilin nga nakataas ang alerto sa dakbayan ron nga dili magkumpyansa sa pagbantay sa siguridad.
Dugang pamahayag ni Col. Bajao nga dako ang posibilidad nga courier sa bomba si Alonzo human nga gibutyag sa mga testigo nga lakip kini sa mga midala sa bomba nga gibilin sa atubangan sa lying-in kung asa kini mibusikad.
Basi matud pa sa inisyal nga imbestigasyon, posibleng nasali lang sa teroristang grupo ang nahisgutan human nga ma-recruit sa Ansar Al Khilafa Philippines.
Pagpaklaro niini nga dili tanang miyembro sa nilong ang mga dautan, kundili aduna lang matud pa mga miyembro sa nilong nga nalakip sa mga na-recruit sa akp ilalom sa dumala kaniadto ni Tokboy Maguid.
