Ya aclara el Coast Guard Zamboanga Station Commander Lt. Noriel Ramos ya descarga el mas de 20 mil saco alegao smuggled rice desde na 3 maga lancha pundiao na finger wharf na Baliwasan, y nohay este perde contra con el mas temprano report.
El aclaramiento ya hace si Ramos na DXRZ-RMN na program Kuskus Batikus como un contestacion con el maga istorya que asegun ya perde el maga arroz mientras bajo pa na imbestigacion.
Asegun con Ramos tiene order desde con el Zamboanga City Bureau of Customs para descarga ya con el maga saco de y transfiri ya na bodega.
Si donde bodega ya lleva con el maga arroz nohay mas sabe si Ramos.
Este tambien un constestacion con el cosa ya revela na DXRZ –RMN si Felimon Salazar, el head del Customs Police quien ya expresa tambien su sentido despues el Zamboanga City Customs Collector ta manda conele explica por el alegao perdicion del maga arroz.
Ya habla tambien si Salazar que asegun na palabra di Ramos tiene ya order desde conel Customs Collector para larga con el maga saco de arroz.
El report ya llega na atencion di Salazar asegun ya sale perdido el maga arroz desde na 3 maga lancha.
Pero el mas cosa yah ace confundi con el maga gente amo del Martes el combinao fuerza del Bureau of Customs, NBI y otro maga unit del otoridad ya man raid na bodega na Tetuan donde ya recobri asegun maga saco de arroz que ya sale perdido desde na 3 maga lancha pundiao na un finger wharf na Baliwasan Seaside.
Accordando el maga miembro del Philippine Coast Guard ya aguanta con el 3 lancha na mar del Septiembre 23 despues sila resivi report ta carga este cuantos contraband como droga pogivido.
Pero cuando ya checquia coneste el maga otoridad solamente mas de 20 saco de arroz lang el carga del 3 lancha.
Ya lleva pundia con el 3 lancha na finger wharf na Baliwasan Seaside hasta ya rebenta el diferentes istorya.
