Davao City – Gikatakdang mahatag na sa mga Alternative Learning System (ALS) teachers ang ilang honorarium human kini nagbaton sa pagka langay.
Sa interbyu sa DXDC RMN Davao kang Cristita Bation, Education Program Specialist sa ALS, gikumpirma niini nga ginaproseso na karon ang honorarium sa ALS teachers kun Instructional Managers (IMs) dinhi sa syudad sa Davao diin maisa ang ilang dawaton nga mao ang alang sa first quarter ug second quarter nga honorarium.
Gipasabot ni Bation nga nagbaton gayud og delay sa honorarium sa mga ALS teachers tungod sa daghanang mga aktibidad nga gi-atiman sa DepEd dinhi sa dakbayan.
“Karon lang gyud na nadugay. Nangasaba gani si Ma’am Ines (Dr. Maria Ines C. Asuncion, Davao City schools division superintendent) kay dapat walay backlog. Karon lang nadugay kay diri baya ang Palaro, diri ang DAVRAA,” saysay ni Bation.
Apan gikanayon ni Bation nga posible gayud nga magbaton sa pagkalangay labi na nga aduna pay mga dokumentong angay kumpletuhon aron maka proseso sa payroll alang sa nahisgutan.
“Kay kung sweldo mag-expect man gyud ta nga every month mahatag dayon. Pero ang honorarium, ug kanus-a tanan documents matapok, saka pa namo na sya mahimuan og payroll unya i-submit pud namo na sa city,” saysay ni Bation.
Nasayran nga anaa sa 100 ka mga magtutudlo ang nagtrabaho isip ALS teachers ilawom sa Local School Board (LSB) dinhi sa dakbayan.
RadyoMaN Kirby Manzon
