Davao City – Luyo sa barato nga kilo sa kopras nga nasinatian sa pagkakaron, naghatag og mga alternatibong pamaagi ang Philippine Coconut Authority (PCA) ngadto sa mga mag-uuma partikular na ang mga coconut farmers aron dili usab maapektuhan ang ilang kita kun income sa uma.
Sa interbyu sa DXDC RMN Davao kang Liza May Lamban, Regional Technical Staff sa PCA Region-XI, gibutyag niini nga nagtanyag ang PCA sa mga mag-uuma sa tibuok rehiyon og libreng mga pananum ingon man abuno ug uban pang mamahimong kapangitaan tungod sa kapit-os sa kita sa kopras.
“We are giving plant materials, tapos providing fertilizers. Then by providing other crops for intercropping and providing livestock. And also value adding, ginatabangan sila unsaon nila paggamit sa ilang mga lubi aside sa pagdepende sa kopras,” saysay ni Lamban.
Dugang niini nga gawas sa kopras, mamahimong mabaligya ang lubi partikular na ang pinaagi sa buko juice o kaha pagproseso sa lubi sa pagmugna og virgin coconut oil.
Samtang gi-angkon sa Regional Technical Staff sa PCA nga dili nila kontrolado ang kilo sa kopras diin nag-unang rason sa ubos nga presyo niini mao ang daghang mga ‘competitors’ sa laing nasud diha sa international market nga nagbaton og mas baratong presyo sa ilang mga produkto.
RadyoMaN Kirby Manzon
