ALU-TUCP andam mutabang sa service crew sa Chowking kun tanggalon sa management

Nanawagan ang Associated Labor Union-Trade Union Congress of the Philippines (ALU-TUCP) sa service crew nga mudangop sa ilang buhatan kun tanggalon sa Chowking Davao Management human mag viral sa social media.

Sumala ni Sofriano Mataro sa ALU TUCP nga ilang hatagan ug labor lawyer ang service crew kun desidido kining mupasaka ug labor case batok sa Chowking Management nga nakabase dinhi sa syudad sa Davao.

Matud ni Mataro nga adunay katungod ang service crew nga mupasaka ug kasong illegal dismissal kun tanggalon sa Chowking kay nagviral ang post sa usa ka netizen nga kaugalingong kwarta ang gipamasahe sa PUJ sa trabahante nga muhatud ug order sa mga customer.

Gihangyo usab ni Mataro ang tabang sa DXDC nga ma-locate ang maong service crew aron matabangan sa gikinahanglang legal assistance sa iyang katungod isip usa ka mamumuo.

Gipaklaro usab ni Mataro nga dili makatarunganon nga abagahon sa service crew ang transportation expenses sa pagdeliver sa order sa mga kustomer aron lamang mudako ang sales sa Chowking Ecoland.

RadyoMaN Erin Lumosbog