General Santos City—nagbuy-od ug wala nay kinabuhi ang usa ka 46 anyos nga amahan human nga gitusak-tusak ug dunggab sa wala pa mailhing suspek sa gamayng eskinita sakop sa Barangay West, Gensan duol sa West Elementary School.
Ang biktima nailang si Rogelio Degamon Jr., 46, residenti sa Prk. Kalubihan, Cawa, Barangay West ning syudad.
Alas 6:00 ang takna sa buntag, Myerkules, July 12, 2017 dihang nakadawat ug report ang Police Station 1 bahin sa patayng lawas nga nakaplagan sa maong lugar kung asa biktima nagkulob nga dunay (5) ka samad dinunggaban sa nagkandaiyang parti sa kalawasan.
Subay sa pahayag sa anak sa biktima nga si Rhea Marie Degamon nga alas 10:00 ang takna sa gabie niadtong Martes, July 11 dihang miuli sa ilang panimalay ang iyang amahan apan pila ka minutos ang nakalbay subli kining milakaw ug wala na sila masayod kung asa kini padulong.
Nakurat nalang sila dihang ilang nabalitaan nga patay na ang iyang amahan human gidunggab sa wala pa mailhing suspetsado.
Giangkon ni Rhea Mae nga dawsa nalisuan ug panghuna-huna ang nasangpit nga biktima gumikan sa depresyon tungod sa problema sa pamilya.
Nasayran nga dawsa dunay gamayng problema sa relasyon sa biktima ug asawa niini butang nga gikasakit sa nahisgutan. nasayran usab nga paborito gyud nga tambayanan sa biktima ang lugar nga nahitabuan sa krimen.
Sa karon padayon pa ang gihimong imbistigasyon sa kapulisan kalabutan sa insidenti ug usa sa mga anggulong ilang gitutukan ang posibilidad nga natripan lang ang biktima sa wala mailhing suspetsado.
