General Santos City—Patay nang nakaplagan sa ilang mga silingan ang mag-amahan sulod mismo sa ilang panimalay sa may purok 4, Barangay Langcaliaf, Polomolok, South Cotabato alas 9:30 sa bugtag kagahapong adlawa.
Giila ang mga biktima nga silang si Mark Jonas Vallente Panadero, 29 anyos ug anak niining si Chester Ericson Panadero, 11 anyos, grade 6 pupil, residenti sa maong lugar.
Sa inisyal nga imbistigasyon sa Polomolok PNP nasuta nga natingala matud pa ang mga silingan nga wala makagawas ang mag-amahan sa ilang panimalay mao nga ilang gisuta apan nakurat nalang sila dihang nagbitay na ang amahan samtang patay na usab ang iyang anak nga naghigda sa katre.
Nasayran nga adunay agi ug tinuokan ang liog sa biktimang si Chester kansa gituohang gituok una kini sa iyang amahan ayha kini naghikog pinaagi sa paghikot ug pisi sa iyang liog.
Nakaplagan ang siyam ka mga suicide note sa lugar diin nakalatid ang mensahe sa amahan ngadto sa iyang mga kabanay diin nagpadayag kini ug kadismaya human silang nagbuwag sa iyang asawa.
Depresyon ang gituohan sa kapulisan nga hinungdan sa gihimong pagpatay ni Mark Jonas sa iyang anak ug sa paghikog niini human nga siya gibulagan matud pa sa iyang asawa. Ayha nahitabo ang insidenti halos dili na mukaon ug nag sige nalang ug inum ang nasampit nga amahan.
Sa karon ang patayng lawas sa duruha ang gipahiluna na sa ilang pamilya.
