General Santos City— tudo depensa ang amahan nga nag viral sa Social Media human iyang gikulata ang tulo niya ka mga anak sa Purok 5, Barangay Batomelong, Gensan.
Sumala ni Jeffrey Udasan nga drama lang ang tanan tungod buot niyang paulion sa Pilipinas ang iyang asawa nga nag trabaho sa kuwait.
Apan subay sa video nga iyang gipadala sa iyang asawa gawas sa pag bunal-bunal niini sa iyang tulo ka mga anak, iya pang gihiktan ang liog sa iyang kamanghurang anak ug gibira-bira pataas.
dugang pahayag ni Jeffrey nga dugay nang wala silay kumunikasyon sa iyang asawa mao nga siya nabalaka na. wala syay laing mahuna-hunaan aron mapugos sa pag-uli ang iyang asawa kon dili ang iyang mga anak.
giangkon usab niini nga iyang gipasakitan ang iyang mga anak apan iyang giklaro nga hinay raman ang iyang pagbunal gani wala may mga gasgas o samad nga naangkon ang iyang mga anak dihang iya kining gibunalan.
Sa kasamtangan anaa na sa Kustudiya sa CSWD Gensan ang duha ka mga babayeng anak samtang ang lalaking anak niini ang nagpabilin sa kustudiya sa ilang mga kabanay.
Ginapangita pa usab sa kapulisan ang amahan kansa nakasibat dihang girespondihan ang ilang panimalay kagahapong adlawa.
Kahinumduman nga una nang nag viral ang video nga gipadala ni Jeffrey sa iyang asawa nga anaa nag trabaho sa Kuwait kung asa gipakita giunsa niini pagpasakit sa iyang kaugalingong mga anak.
