Glan, Sarangani Province–Planted ang ebidensya, kini karon ang gibarogan sa amahan nga si Sanoy Sarcon nga taga Purok Riverside, Barangay Poblacion, Glan Sarangani Province sa nahimong pag-aresto sa kapulisan ngadto sa iyang anak nga si Hersam Sarcon.
Sumala ni Sanoy nga walay kamatuoran nga naghupot og marijuana ang iyang anak kondili igo lang matud pang gibutang-butangan sa kapulisan human kining nadakpan atul sa gipatumang curfew sa ilang lugar.
Nasayran nga subay sa report gikan sa Glan PNP nadakpan ang suspetsado atol sa buybust operation kung asa nakuha matud pa sa iyang posisyon ang marijuana og 100 pesos nga kwarta.
Usa usab sa gikasuko sa amahan nga si Sanoy ang matud pa mali nga pamaagi sa pagdakop sa kapulisan ngadto sa iyang anak.
Sumala niini nga kung dunay nalapas nga balaod ang iyang anak mahimo man kini nga dakpon apan dili angayan nga kulatahon.
Gihingusgan usab sa amahan nga menor de edad lang ang iyang anak hinungdan nga dili angayang bun-ugon sa mga anaa sa otoridad.
Samtang gitubag usab sa Glan PNP ang aligasyon sa amahan batok sa ilang tropa.
Ilang gihingusgan nga lihitimo ang ilang operasyon. Normal lang matud pa ang nahimong reaksyon sa amahan human nadakpan ang iyang anak. (JB)
