General Santos City—Igo nalang sa pagdangoyngoy ang pamilya ni Carmelo Morta, 27 anyos nga taga Purok 2, Lanton, Barangay Apopong, Gensan kansa namatay sa gihimong buy-bust operation sa Police Station 1, sa may Veterans corner Salazar Street, Barangay South, Gensan niadtong disperas sa pasko, human matud pa kining mingsukol sa kapulisan atol sa operasyon.
Sumala ni Aden Morta, amahan ni Carmelo Morta nga petsa 24 sa hapon dihang adunay sige ug panawag sa iyang anak nga paadtuon matud pa kini sa iyang gitrabahuan tungod tagaan ug bunos.
Gani gipugngan pa niya ang iyang anak nga molakaw tungod nagpreparar sila para sa pagsugat sa pasko apan misaad matud pa iyang anak nga mouli dayon apan nagbuntag nalang wala gyud kini makauli mao nga siya nakabati na ug kakulba.
Nadunggan nalang nila sa report sa DXMD RMN Gensan nga adunay namatay sa buy-bust operation nga ginganlan ug alias Bugnot mao nga ila dayon nga gisuta.
Hilabihan nalang ang kadismaya ni Aden dihang nakit-an ang iyang anak sulod sa morgue sa usa ka punerarya sa dakbayan.
Matud ni Aden nga posibleng na frame-up lang ang iyang anak gumikan wala man kini bisyo, sanglit ang bisyo lang niini mao ang pagdula sa internet.
Panghinaot nalang sa amahan nga mahatagan ug hustisya ang nahistabo sa iyang anak.
