Mitahan ngadto sa militar niadtong Lunes, Hulyo 15, ang amahan ug anak, kinsa gituohang mga protektor sa Dawlah Islamiya Lanao group, sa may Barangay Matitikop, Tubaran, Lanao del Sur, dala ang pagsurender sa ilang duha ka mga kalibre 45 nga pistola.
Matud pa ni Lt. Col. Ian Noel Ignes, commander sa 55th Infantry Battalion, Philippine Army, ang amahan kanhi kapitan sa Barangay Matitikop ug ang anak maoy kasamtangang kapitan, kinsa midaug niadtong 2018 nga barangay elections.
Boluntaryo nga mitahan ngadto sa militar ang duha aron limpyuhan, matud pa, ang ilang mga pangalan human sila gisuspetsahan nga nag-protektar sa grupo sa Dawlah Islamiya human madiskubrehan nga naa nagkampo ang grupo sa maong barangay nga maoy hinungdan sa engkuwentro niadtong Marso 11, karong tuiga.
Tulo ka adlaw sa pagsugod sa maong engkuwentro, upat ka mga sakop sa teroristang grupo ang namatay, lakip na niini si Owayda Benito Marohomsar, kinsa naila usab nga Abu Dar, ang gikatahong leader nga mihulip kang Isnilon Hapilon kinsa namatay panahon sa Marawi siege.
Miingon si Ignes nga dili mahimong isog ang maong mga terorista nga magkampo sa usa ka dapit kung walay mo-protekta kanila nga mga opisyal o kaha adunay impluwensiya nga tawo.
Gilimod, matud pa, sa duha nga nagsuporta sila sa mga terorista tungod kay atua lamang sila sa dapit niadtong higayona tungod kay aduna silay panagtagbo sa isa ka international nga non-government organization.
