Amay nga nagdul-ong sang iya bata sa eskwelahan gintiro sang riding in tandem patay, love triangle ukon trabaho ginalantaw nga motibo

SILAY CITY, NEGROS OCCIDENTAL – Padayon karon ang hot pursuit nga ginapatigayon sang mga katapo sang Silay City Police Station batuk sa mga suspek nga nagtiro patay sa isa ka biktima may mga las 7 sini gid lamang nga aga sa area sang Purok Sampaguita, Brgy. E. Lopez, Silay City.

Ang biktima nakilala kay Ramiro Turalba, 45 anyos ang edad, residente sang Purok Sunrise, Brgy. E. Lopez, ciudad sang Silay kag nagatrabaho bilang checker sang Agrivet Mineral Corporation.

Suno sa panaysayon sang mga nakakita, ang biktima ang nagasakay sa iya motor halin sa E. Lopez Elementary School agud sa pagdul-ong sang iya bata kag manugpauli na kuntani.


Pahayag sang witness, gintupungan sang suspek nga riding in tandem ang biktima kag hinali na lamang nga gintiro kag naigo sa idalum nga bahin sang iya dalunggan.

Nahibaluan nga duha ka bulan na ang nakaligad sang gintuyo man nga tiruhon ang biktima.

Sa pihak nga bahin, base naman sa pahayag sang asawa sang biktima nga apesar nga wala sang may nabaton nga death threat ang iya bana, apang may nagadumot sa iya.

Gina-establish man sa karon sang mga utoridad ang motibo sang krimen kon bala ini ang konektado sa iya trabaho bilang isa ka checker ukon sa ginaalegar love triangle nga base naman sa pahayag sang asawa./dyHB BACOLOD

Facebook Comments