Sarangani Province- Laing personalidad na usab ang nibisita sa probinsya sa Sarangani, human sa Budayaw Festival, kini pinaagi sa ambassador sa nasud Thailand nga si His Excellency Thanatip Upatising.
Kauban ni Ambassador Upatising ang kapikas sa kinabuhi niiini nga si Monthip Upatising og ang mga kadagkuan sa Thailand Embassy naka-basi sa kauluhang Maynila.
Mismong ang Thailand Ambassador ang nangunay sa pagbisita aron personal nga malantaw ang mga pampublikong eskwelahan sa Sarangani nga posibleng mapilian sa Prinsesa sa Thailand nga mamahimong binipisyaryo sa ilang programa gitawag nga “sustainable feeding program.”
Adbokasiya matud pa ang school feeding sa ilang prinsesa, ang Royal Highness nga si Princess Maha Chakri Sirindhorn, anak sa namatay nga hari sa Thailand nga si Haring Bhumibol Adulyadej.
Pinasahi ang programa maong gitawag nga sustainable tungod kay kinahanglan kining mulahutay pinaagi sa pagsiguro nga aduna gayuy makuhaan para ipakaon sa mga bata. Kinahanglan nga ang tulunghaan ang adunay kapasidad og may igong luna aron kabutangan og fishpond para magbuhig tilapia, magbuhi pud og mga hayop sama sa manok og kanding, og may luna para mananum og mga gulayon.
Kini ang buot tagaan og pondo sa Prinsesa sa Thailand masiguro nga luwas ang mga gipangkaon sa mga kabataan. Muhatag pud kini og suplay sa gatas para imnon sa mga bata.
Anaa ang mga ginikanan musiguro nga mulambo ang programa og pwede pud nilang mamahimong panginabuhian ang backyard farming sa eskwelahan.
Dako kining ikatabang maong nagpasalamat ang DepEd Sarangani. Niuban sa pag-inspeksyon si Sarangani Assistant Schools Division Superintendent Diosdado Ablanido og ang Sulong Karunungan program ni Governor Steve Chiongbian Solon.
Sa habig ni Ambassador Upatising, gibutyag niini nga napili niaging tuig sa ilang prinsesa ang mga eskwelahan sa Surigao del Norte, Samar, Leyte og Antipolo, og karon buot niining mutabang sa Sarangani Province, hilabi na sa mga lugar nga gipuy-an sa mga kaigsoonang Muslim.
