Ambulansya ag motorsiklo nagsunggaban, 1 patay, 1 naka ICU

26

Kalibo, Aklan – Sambilog rong patay ag sambilog rong naka ICU matapos nga magsunggaban kabii rong ambulansya ag motorsiklo sa national highway kung Brgy. Linabuan Norte, Kalibo partikular sa prente sa it Caltex Gasoline Station.
Rong driver it motorsiklo hay nakilaea kay Niño Leo Dela Rosa, 29-anyos it Baybay, Andagao, Kalibo nga sa makaron hay naka ICU bangud sa naangkon nga lastro sa ueo, ag bali sa butkon ag batiis.
Samtang rong namatay hay nagapabilin pa nga uwa makilaea kung sa siin gindeklarar it anang doctor nga ginbawian it hueam nga kabuhi mga alas 9:05 kabii. Imaw ra rong backrider ag taga Antique nga kaibahan ni Dela Rosa sa trabaho.
Suno kay PO3 Jomar Ortega it traffic section kung Kalibo PNP nga natabo rong aksidente matapos nga rong ambulansya nga ginapanag-iyahan it provincial government kung Aklan nga gina maneho ni Joe Marie Mechado , 56-anyos it F. Quimpo St., Kalibo hay halin sa syudad it Iloilo ag pabalik eon iya sa Kalibo apang pag abot sa lugar hay imaw ra nag overtake sa anang ginasundan nga mga saeakyan ag sinunggaban rong Rusi 125 nga motorsiklo nga ginasakyan it mga biktima paadto man sa direksyon it Banga.
Nasayuran nga uwa it headlight rong nasambit nga motorsiklo.
Samtang basi man sa panugiron ko pamilya ni Dela Rosa nga kahapon rayang namatay nga nakilaea eamang nanda kay alyas “JUN” hay naghatod it sweldo ni Niño Leo ag nag inum-inum pa.
Pagka gabii hay maadto kunta sanda sa Lianbuan Norte mausoy it ubod nga pagadaehon sa Antique ay may kompleanyo makaron nga adlaw.
Rong driver it ambulansya hay detained makaron sa lock up cell it Kalibo PNP para sa nagakaigo nga disposisyon.

Facebook Comments

From Advertisers