Porcausa na su amor para consu tata quien ya gueria conele bolo que ya causa irida na su detras, el un 14-año solterito nohay mas comforma pa planta caso consu burachon tata conquien ya aresta el pulis despues el incidente.
Si Robin Eugenio, el victima, quien un residente del Zone 2, Culianan aqui na ciudad, ya habla conel pulis que gende mas le planta caso consu tata nombrao como si Roel Eugenio, 48 año, porcausa gende le asegun aguanta mira ay man preso este.
Con Roel ya aresta el maga pulis del Culianan Police Station na encabesamiento del hefe si Chief Insp. Hazel Fernandez del Miercoles denoche despues este ya sopla y ya gueria pa bolo consu anac si Robin que ya causa para iri el detras del solterito.
El incidente ya bene despues si Robin ya usa conel motorsiclo del su tata sin el su permiso y ya hace hatud conel diila pariente na highway del Culianan.
Aquel tiempo buracho si Roel quien ya rabia consu anac y derepente este ya sopla con Robin y nohay pa man contento, ya arangca pa este su bolo desde na baina y ya queria consu anac que ya tupa na detras del victima.
Ayer tarde despues de sale na hospital si Robin, ya anda pa este na estacion donde detenido su tata y ya lleva pa este comida consu tata ya ya habla que gende mas le planta caso consu tata porcausa consu amor amediante el cosa este ya hace conele.– Dan Toribio
