Syudad sang Iloilo – Tuman ang kalipay ni Daryl Jasyl Lim Cañon matapos nagpangibabaw sa March 2019 Medical Technologist Licensure Examination.
Nagrank number 4 sa Top 10 Medical Technologist Licensure Examination si Cañon nga may 90.40% nga rating.
Nahibaluan nga produkto si Cañon sang Central Philippine University (CPU) kag labing una nga Summa Cum Laude graduate sang BS Medical Laboratory Science sa nasambit nga eskwelahan.
Tumandok sang Oton, si Cañon ang subang sa duha ka mag-utod sa diin ang iya amay nagatrabaho bilang taxi driver kag nurse diri sa Iloilo ang Iloy.
Sa interview sang RMN Iloilo, ginpahayag ni Cañon nga ginhandum kag ginpangamuyu-an niya nga mangin topnotcher sa exam.
Ginpahayag man sini nga ang iya pamilya amo ang nagaserbe nga iya inspirasyon.
“Isa sa mga bagay nga nagamotivate sakon ang — kon makita mo ang imo parents nga naga-obra gid. Dira mo mapanumdom nga kon ikaw nabudlayan how much more pa ayhan ang pagpangabudlay nila para sa imo.”
Sa mga estudyante, may panugyan man si Cañon sa epektibo nga study habits.
“Para sa akon ang pinaka-effective guro nga study habit is kon, tuon ka kon san-o gusto sang lawas mo, kon san-o feel mo optimum ka, kon san-o may ara ka willingness. Kon sa muna ka nga oras magtuon— kon may ara willingness sa imo kag may drive ka nga magtuon, ang pagtuon indi siya pilit kag mas ma-interesado ka pa gid nga mabal-an ang isa ka bagay.”
Mensahe sini sa kadam-an, indi magkalipat nga magpangamuyo sa Ginoo.
“Seek God first sa imo nga kabuhi kag kon ano man ang ginadesire sang imo taguipusu-on pangumuyuan ina sa iya. If you want to reach or achieve something, you have to work hard for it but at the same time your faith should be greater gid… because sa tanan nga bagay kung plano ina sang Diyos para sa aton then He will give it to us. Kon makahimaya gid ina sa iya then He will surely grant our wishes.”
Photo ctto
