Davao City – Dakung hulga kun threat sa panglawas sa katawhan ang 2019 novel coronavirus sa rason nga wala pa’y tambal o bakunang nadiskubrehan aron sulbaron ang maong kulba nga balatian.
Matud ni financial analyst Professor Astro Del Castillo, labing maigo kun maapektohan sa 2019-nCoV mao ang turismo ug ekonomiya sa Pilipinas ug sa kalibutan.
Segun ni Del Castillo, kung ang panglawas na gani ang maigo, may purohan gayud nga muhunong usab ang pagdagan sa ligid sa ekonomiya sa mga nasud sama sa Pilipinas.
Dauton man gud sa nCoV ang trading sa China ug Pilipinas bisan na ang adlaw-adlaw nga panglihuk-lihuk sa katawhan ingon man ang pag-transport sa goods and services.
Sa usaka pagtoon, napalgan sa senior scholar sa John Hopkins Center for Health Security nga si Dr.Erik Toner nga adunay direktang koneksyon ang pag-andar sa ekonomiya diha sa mga biyahe sa eroplano, barko, train ug mga mga behikulo.
Dakung transaksiyon sa Pilipinas uban sa China ang transportasyon ug uban pang dagkung mga imprastraktura sama na lamang sa mga proyektong ubos sa ‘Build Build Build’ mega infra project sa Duterte administration.
Sa miaging tuig, dili moubos sa 1.2M ka mga turistang Tsino ang gi-estimate nga nibisita sa nasud apan tungod sa travel ban batok sa mga Chinese nationals, naigo ang turismo, in particular ug ekonomiya, in general.
Dugang ni Del Castillo, dili angay mag-panic ang katawhang Pilipino niining pagsi-aw karon sa 2019-nCoV ARD nga mikutlo na og kapin 300 ka mga kinabuhi ug kapin 16,000 ka mga tawo kinsa nagpositibo sa tibuok kalibutan.
Gihagit karon ni Del Castillo ang national government nga mangandam sa kanunay sa posibilidad nga basin mas mo-grabe pa ang pagkaylap sa virus kung dili dayon makontrolar sa mga hingtungdang ahensiya ang pagkuyanap ning maong pandemic.
RadyoMan Joel Viray
