Davao City – Walay igong kapasikaran ang panawagan nga palagputon sa pwesto si Philippine National Police (PNP) director-general Ronald ‘Bato’ dela Rosa gumikan sa persepsyon nga pakyas kini sa pagpugong sa mga extra-judicial killings sa kampanya kontra drogas.
Kini maoy gibarugan karon ni Ateneo de Davao University (AdDU) Department of Science and History Prof. Ramon Beleno III atol sa interview kaniya sa tulumanong ‘Straight to the Point’.
Segun kang Beleno, ‘natural target’ sa mga Duterte critics si Dela Rosa gumikan siya man ang dagway sa kampanya sa gobyerno batok sa iligal nga droga.
Matud sa Ateneo professor nga dakung uyon siya sa pagpabalhin sa ‘lead role’ sa drug war gikan sa PNP ngadto sa Philippine Drug Enforcement Agency (PDEA) apan siya nabalaka gumikan tino gayud nga aduna kiniy kakulangon sa gidaghanon sa mga personahe.
Base sa ninggula nga mga datos, aduna lamay more or less 2,000 PDEA agents entero nasud, layo ra sa 120,000 nga numero sa kapulisan nga naggunit kaniadto sa anti-drug campaign.
Sugyot sa Davao academician nga gikinahanglang reviewhon pag-ayo kun unsaon pagpugong nga makasulod ang droga dinhi sa Pilipinas diin gisugyot usab nga mas palig-onon pa ang partisipasyon sa matag residente sa barangay sanglit sila mismo nakahibalo kun pamilyar sa mga kalihukan sa ilang mga silingan ug katagi-barangay.
RadyoMan Jason Amisola
