Giklaro sa Department of Health – Northern Mindanao nga duha lamang ang kumpirmadong kaso sa 2019 Novel coronavirus-acute respiratory disease (2019-nCoV-ARD) sa Pilipinas.
Sa intrerview sa RMN Malaybalay ngadto kang Dr. Ian Christian Gonzales, ang cluster head sa DOH Region 10 Infectious Diseases gibutyag niini nga ang maong duha nga natakbuyan sa NCOV atoa sa Manila nga susamang mga Chinese nationals.
Samtang gibutyag ni Dr. Gonzales nga adunay duha ka persons under investigation kon PUI’s sa rehiyon 10 nga anaa karon sa Northern Mindanao Medical Center nga susamang Chinese Nationals.
Bulontaryo nga nagpahiling sa NMMC ang duha nga mitug-an nga nakasinati sa ubo ug hilanat.
Gilayong gikuhaan sa blood samples ang mga langyaw ug gipadala ang ilang laboratory test sa Research Institute for Tropical Medicine (RITM) sa Metro, Manila.
Matud ni Dr. Gonzales nga sa pagkakaron gihulat pa nila ang resulta sa duha ka PUI’s ug gilauman kini nga muabot karong gabie o ugmang adlawa.
Samtang sa interview sa RMN Malaybalay ngadto kang Presidential Communications Secretary Martin Andanar gibutyag niini nga magpatawag usab siya ug meeting alas 9 sa buntag ugmang adlawa (Pebrero 4, 2020) sa mga regional directors sa Northern Mindanao aron hisgutan ang mga measures sa NCOV.
Unyang gabie, adunay meeting usab silang pagahimoon sa Malakanyang nga pangunahan ni Pangulong Rodrigo Duterte adunay kalambigitan sa mao nga sakit.
