Malaybalay City, Bukidnon – Adunay mas lawom nga hinungdan ug dili lang angayang mahimong kasagarang tradisyon ang pagbutang ug abo sa agtang alang sa mga katoliko.
Sa interview sa RMN Malaybalay ngadto kang Bishop Jose Cabantan sa Diocese of Malaybalay gibutyag niini nga ang Ash Wednesday timailhan nga nagsugod na ang Kuwaresma o Lenten Season.
Kini matud pa ang panahon nga huna-hunaon ang direksiyon sa kinabuhi nga latason ug mga butang nga buot himoon.
Pahinumdom sa simbahan, nga mas maayong sugdan ang pagninilay-nilay sa pagkumpisal ug pagpangayo ug pasaylo sa Diyos.
Gipahinumdum usab sa Obispo nga angayang magpuasa sulod sa kuwaresma alang niadtong mga adunay kaya apan dili usab obligado ilabina kadtong mga adunay sakit ug senior citizen.
Gawas niini, angayan usab nga tamdan ang abstinensiya nga likayan ang pagkaon ug karne.
