Imbes nga magbantay sa palibot sa posibleng kasamok nga mahitabo, misaka sa bukid ang mga empleyado sa kagamhanang lokal sa Iligan ug uban pang ahensiya sa gobyerno, mga sakop sa kapulisan ug sa Philippine Army.
Kini aron tapukon niadtong Sabado, Disyembre 26, ang kapin kun kulang 300 ka mga pamilya sa Sitio Salingsing sa Barangay Rogongon, usa sa mga bukid sa Iligan nga kanunay gibisita sa rebeldeng New People’s Army.
Matud pa ni LtC. Domingo Dulay, commander sa 4th Mechanized Infantry Battalion, tumong nila nga matugbangan ang pagsaulog sa NPA sa ilang ika-52 nga anibersaryo.
Dala nila ang mga batakang panginahanglanon sa matag pamilya nga gilangkuban sa bugas, groceries, tambal ug tsinelas alang sa matag pamilya ug indibiduwal ug seedlings alang sa mga mag-uuma sa dapit.
Gawas sa LGU, sa Philippine National Police ug sa Army, kuyog sa maong misyon ang Technical Education Skills and Development Authority (TESDA) aron mopahibalo sa mga skills training program nga libre ug ang Department of the Interior and Local Government (DILG) nga maoy nag-unang ahensiya sa pagpatuman sa Task Force to End Local Communist Armed Conflict (TF ELCAC).
Usa ka programa ang gipahigayon kauban ang mga lumad nga Higaonon sa Rogongon diin nahimong highlight sa programa ang ilang pagsunog sa pula nga bandila sa NPA aron ipakita ang ilang pagkondena sa rebeldeng grupo.
Ang Sitio Salinsing sa Rogongon usa sa mga dapit sa Iligan nga gibantayan sa Army tungod kay dinhi kanunay makit-an ang presensiya sa mga rebelde. Nahimutang kini duol sa mga daluna sa Misamis Oriental, sa Bukidnon ug sa Lanao del Sur. (Divina M. Suson, December 28)
