Davao City – Posibleng tinuod ang pagbulgar ni Senador Ronald Dela Rosa kabahin sa modus operandi o binuang diha sa pagpagawas sa mga konbiktadong kriminal pinaagi sa balaud nga Good Conduct Time Allowance (GCTA).
Sumala ni Atty.Leonard Cagatin adunay posibilidad ang gibutyag ni Dela Rosa tungod kay nahimo kining hepe sa Philippine National Police una pa nahimong senador.
Hinuon giklaro ni Atty.Cagatin hangtod walay napasakaan og kaso pinaagi sa imbestigasyon sa maong anomaliya magpabilin siyang way kamatuoran.
Samtang sa hisgutanang kurapsyon diha sa mga prisohan, posibleng adunay dili patas ang tratasyon sa mga piniriso diha sa ilang tagsa-tagsa ka mga selda tali sa adunahan ug pobre nga mga konbiktadong kriminal.
Giklaro usab ni Cagatin, aron maundang ang giingong korapsyon sa mga Penal Institutions ipatuman ang balaud ug pasakaan sa kaso ang mga mapamatud-ang nalambigit niini.
RadyoMaN Bernard Pantallon
