Davao City – Giawhag sa PRO XI ang publiko nga mudangop sa kapulisan kun nakatagamtam ug dili maayong kasinatian sa pagpang apod apod sa social amelioration program tungod kay adunay anomaliya diha sa mga kabarangayan.
Sumala ni PRO XI Regional Director Brig General Filmore Escoval nga sa presento sa kapulisan mupatala sa ilang reklamo ang publiko ug isaysay ang tanang impormasyon sa anomaliya diha sa pagpang apod apod sa financial assistance alang sa mga apektado sa lockdown.
Matud ni Escoval nga igo na ang testimoniya sa mga complainant isip kabahin sa mga documentary evidence nga mahimong mupabarog sa kaso batok sa mga responsabli sa anomaliya sama sa mga opisyal sa brgy ingun man taga DSWD.
“Kinahanglan namo kanang detalye i-identify kinsa tong mga involve na personalities na mga brgy officials kay we can initiate the investigation. Sympre kinahanglanon pud nato ni ibase sa mga ebidensya para ma build up nato ang kaso para ma paylan ni sila ug kaso. Kay di pud nato ni i-allow na mahitabo na take advantage ang atong mga tawo nga naglisud na gani unya gi take advantage pa” segun ni Brig. General Escoval.
Gidugang sa director nga mahimong manawag ang mga agrabyado aron mureklamo sa PNP Hotline, ug mudangop sa Regional Investigating unit ingun man sa Criminal Investigation And Detection Group (CIDG).
Kahinumduman nga nagpagawas ug direktiba ang DILG sa PNP nga nagmando nga mutabang sa imbestigasyon ug mupasaka sa kaso batok sa mga nalambigit sa anomaliya sa distribusyon sa SAP.
RadyoMaN Aimee Guinita
