Niadtong Abril 2023 sa Davao City, mipasar sa ikatulo ug katapusang pagbasa ang anti-bullying ordinance diin ilawom niini, paningkamutang mahimong safe place ang panimalay, tulunghaan ug trabahoan ilabi na sa mga bata.
Ubos usab sa ordinansa, gimanduan na ang matag eskwelahan ug business owners nga magmugna og istriktong palisiya aron mabatukan ang bullying. Lakip pud dinhi ang paghatag ug interventions ngadto sa biktima.
Subay niini, nanawagan ang psychology professor nga si Hexcel Andreu atol sa interview sa DXDC RMN Davao nga kini himuong aktibo ug pakusgan aron malikayan ang susamang insidente sa Brgy. Lacson Calinan District, Davao City nga usa ka 10 anyos nga batang lalaki ang naghunos sa kinabuhi human matud pa gi-bully sa iyang kadula ug gikantyawan nga ‘walay ginikanan’.
Butyag pa sa propesor nga mas bulnerable ang kabatan-unan sa madungog nga mga pulong hinungdan nga angay awhagon nga ginikanan o guardian nga mamahimong aktibo usab sa paggiya kanila. Samtang ang author sa anti-bullying ordinance sa Davao City nga si Councilor Enzo Villafuerte, personal nga mibisita sa haya sa biktima ug miunong sa kasubo sa pamilya.
RadyoMaN Ivy Parido
