Matud ni Anti-communist Advocate Chito Herbolingo atol sa interview sa DXDC RMN Davao, naglipay ang mga Pilipino sa kalit nga pagtaliwan sa Founding Chairman sa Teroristang CPP-NPA-NDF nga si Professor Joma Sison kini human gikonpirma mismo sa tigpamaba sa mga komunista.
Sigun ni Herbolingo, sa kamatayon ni Joma magsilbi na usab kini nga hustisya alang sa mga libu-libo nga biktima sa niluog nga binuhatan sa mga NPA ngadto kanila.
Hinoon, nagpaabot og pahasubo si Herbolingo ngadto sa pamilya tungod sa pagkamatay ni Joma human sa duha ka semana nga pagka-ospital gumikan sa balatian nga gihambin niini.
Gibatbat ni Herbolingo, ang pagkawala ni Joma Sison dili makapabungkag sa CPP-NPA-NDF sa rason nga magpabilin gihapon mubarog ang mga anaa sa central committee.
Apan ang labing maayo lang mao nga dyotay nalang ang mga personalidad nga naa sa central committee
tungod sa unom nga kampanya sa miaging administrasyon pinaagi sa NTF ELCAC.
Dugang ni Herbolingo, nagtinga na karon ang CPP-NPA-NDF ug haduol na ang pagkalusaw niini nga organisasyon sanglit ang mga personalidad nga posibleng mupuli sa poder ni Joma walay karisma ug hurot-hurot na sab ang ilang mga lideres kay nanurender ug nangamatay sa giyera.
RadyoMaN Joel Viray
