Davao City – Girespeto sa Department of Education Davao Region ang mando karon ni Mayor Inday Sara Duterte-Carpio nga control measures ug guidelines alang sa syudad sa Dabaw.
Matud ni Deped 11 Spokesperson Dodong Atillo nga ang ilang buhatan misumite sa kaalam sa mayor sa pagkanselar sa mga klase isip control measures ug guidelines kontra sa Coronavirus Disease 2019.
Gani isip pagpakita og suporta sa diriktiba ni Mayor Inday, ang DEPED 11 nagpagula dayon og kamanduan nga dili una padyutihon kun pareporton sa eskwelahan ang ilang mga magtutudlo.
Segun ni Atillo, ang pagdili sa pagtapok-tapok kun gathering, pagtambong sa misa ug uban pang buhat ang tumong ani mao man ang kaayohan sa katawhan nga dili matakdan sa COVID-2019.
Alayon niini, nakadayeg ang tigpamaba kang Mayor Inday Sara Duterte-Carpio gumikan sa paspas nga pagdeklara og control measures ug guidelines sa pagsulod ug pagawas sa dakbayan sa Dabaw.
Nagtoo ang opisyal nga walay mahitabong kausaban sa kinabuhi sa mga tawo kun sa mga Dabawenyo bisan og magpundo na lamang una sila sa ilang mga balay ug dili una sila makalulinghayaw sa gawas.
Busa andam mupaluyo kun musuporta ang Deped 11 sa kamandoan ni Mayor Sara sanglit ang katuyoan lang man ani mao ang proteksiyon sa katawhan gikan sa COVID-19.
RadyoMaN Joel Viray
