Davao City – Wala na kinahanglana pa ang State of Calamity sa Davao City bisan pa og nagdeklara na og national epidemic ang Department of Health (DOH) gumikan sa pagsutoy sa kaso sa dengue sa tibuok nasud.
Matud ni Davao City Health Officer Dr. Josephine Villafuerte, kontrolado pa gihapon sa syudad ang mga insidente sa dengue sa dakbayan maong walay rason aron ipailawom pa sa usaka estado sa kalamidad ang atong dapit.
Giangkon ni Villafuerte nga daghan ang naigo sa dengue apan kini nga ihap sa mga natakbuyan dili pa makatupong sa ubang lugar nga dunay taas nga casualty rate sa naasoy nga balatian.
Mao kini ang gigamit nga basehan sa hepe sa City Health Office nganong wala sila nag-recommend ug special declaration sa Konseho ning dakbayan hangtud ning mga panahona.
Subling gipalanog sa opisyal nga wala magkulang ang gobyernong lokal sa programa kontra dengue apan ang problema, ang mga tawo maoy naglingog-lingog sa ilang pahimangno.
Bus, kun aduna ma’y angay balikan sa mga pagmahay kana mao ang katawhan mismo ug dili ang DOH ni ang CHO sa katarongan nga ila nang nabuhat ang ilang trabaho sa pagpasidaan sa katawhan, matud ni Villafuerte.
Gidasig pag-usab sa CHO chief ang publiko nga batasanon ang 4’oclock habit sanglit epektibo kini nga istatehiya sa pagsanta sa sakit nga dengue nga mikutlo na og pipila ka kinabuhi sa tibuok nasud.
Subay sa ulahing talaan sa CHO niadtong July 31, mikabat na og 1,414 ang naigo sa dengue kun dunay pagsaka nga 293 gikan sa nanglabay nga mga bulan.
Sa kinatibuk-ang listahan sa DOH, gikan January 1 hangtud July 20 karong tuiga, anaa na sa 146,062 ang natala nga dengue incidents sa nasud diin apil na niini ang 622 ka pasyente nga namatay sa nasangpit nga sakit.
RadyoMaN Joel Viray
