Davao City – Gipaniguro sa Talomo Proper Barangay Council nga masilotan gayud ang mga residente nga walay kaugalingon nga sanitary toilets ug septic tank kun kasilyas ug diresto nang ginalabay sa sapa ang hugaw sa tawo gikan sa ilang mga comfort rooms.
Nanganti si Barangay Captain Bendor Calamba nga ila gayod kasuhan ang mga lumulupyo nga masakpang nagtaod og PVC sa CR ug gi-kolokar sa baba sa sapa aron malabay ang hugaw sa tawo.
Gipasabot ni Calamba nga dili niya buot nga ma-kontaminar ang ilang sapa sa polio virus gumikan sa hugaw sa tawo nga mipaingon sa Davao River hinungdan nga nagpositibo sa maong balatian ang dakbayan.
Gimando usab sa kapitan ang pagdili sa pagpuyo sa dike nga portion o bisan daplin sa sapa aron wala gayuy hugaw sa tawo maadto sa sapa tungod sa peligro sa panglawas niining polio virus.
Gipalihok na usab ni Calamba ang iyang mga sakop aron mupasabot sa kalainan tali sa Dengvaxia ug anti-polio vaccine ingon man ang peligro sa panglawas sa ilang anak kung dili madapatan og bakuna nga pang alkontra sa polio virus.
Gisugilon usab sa maong opisyal nga sa iyang area of responsibility, mas taas og kinaadman ang tawo ug nasabtan sa iyang katawhan ang importansya sa maong matang sa bakuna.
Busa, kumpiyansa si Calamba nga mo-partisipar ang iyang katawhan sa massive anti-polio vaccination nga ilusad sa City Health Office (CHO) ingon man sa Department of Health (DOH) karong October 14, 2019.
RadyoMaN Joel Viray
