Davao City – Nagtoo ang Victims of Justice, Criminality and Terrorism in Mindanao nga black propaganda lamang ang subling pagdalahig kang presidential son former Davao City Vice-Mayor Paolo Duterte diha sa drug trade sa nasud.
Dili kumbinsido si JCTM convenor Arthur Tariman sa authenticity sa personalidad sa usaka ‘Bikoy’ kinsa maoy nagpabusikad sa alegasyon diha sa social media nga ang kanhi bise mayor sa dakbayan anaa sa likod sa pagkuyanap sa iligal nga droga sa Pilipinas.
Alang kang Tariman, kwestiyonable ang kredibilidad sa nagpaluyo sa bag-ong expose tungod kay kalit lamang kining mitumaw sa publiko nga unta milabay naman og halos duha ka tuig sukad nga gidalahig ang bansagon sa anak lalaki sa pamuno-nasud sa isyung drogas.
Nagpasabot lamang kini nga lisod na kaayong tuhoan pa ang nasangpit nga seryosong alegasyon kontra sa batan-ong Duterte sanglit dili kalikayang magduda ang tawo nga adunay bulok-pulitika diha sa maong seven-minuter video expose diin ang ultimate target dili si Pulong apan ang presidente sa nasud mismo.
Sa matag higayon nga mangalimyon na ang baho sa eleksyon, mo-init gayud kaayo ang bangi sa mga pulitiko diin ang matag kampo mag-isig balibagay og hugaw aron madaut ang ilang kaatbang diha sa katawhan ug sa mga botante.
Apan kung ugaling may basihan man ang maong alegasyon, nan sa korte ug dili sa social media angay ibandilyo ang maong pasangil.
Sa korte, diha na makita ang katag kung aduna ba’y lama sa kamatooran ang akusasyon sa mga kritiko nga si Pulong maoy nagdala sa bansagon nga ‘Polo Delta’ or ‘Alpha Tierra’ kinsa maoy alleged druglord ug responsable sa pagkuyanap sa droga sa nasud, apas-sumpay ni Tariman.
Kahinumdoman nga hugot gilimod ni Pulong ang alegasyon sa katarungan nga maayo muhimo og istorya atubangan sa camera ang nagpasimuno sa video ilawom sa kumpas ni opposition Sen. Antonio Trillanes IV.
Dugang sa kanhi bise-mayor nga daghan sa mga Dabawenyo nagduda nga posibleng binuhian ug binayran sa mga kritiko si Bikong kansang tahas mao ang pagdaut kang Pulong aron sa ingon mawad-an og dungog ang ‘war on drugs’ ni Pres. Duterte.
RadyoMaN Joel Viray
