Anti-rabies vaccination campaign gipakusgan sa CHO

Davao City – Mas gipakusgan pa sa Davao City Health office (CHO) ang pagbakuna sa mga tawo nga napaakaan og iro aron ang rabies dili musaka sa ilang membrane system.

Mas palapdan pa sa CHO ang ilang serbisyo pinaagi sa pagbakuna sa mga Dabawenyo kontra rabies.

Matud ni CHO Chief Dra. Marjorie Culas, kabahin sa ilang gihimong lakang ang himoong matag-adlaw nga operasyon sa mga Animal Bite Center sa Toril ug Marilog gikan sa tag-duha lang ka semana sa mga pasyente.

Segun ni Culas, naglaraw usab sila nga magmuntar pa og dugang Animal Bite Center sa Calinan, Tugbok ug sa ikaduhang distrito sa syudad sa sunod nga mga adlaw.

Gi-isplikar sa CHO head, tumong niini aron ma-decongest ang Animal Bite Center sa sentrong bahin sa syudad sanglit ang mga taga-lagyong lugar dili na kinahanglan pa mulugsong inay didto na lang sa nasampit nga mga lugar aron magpabakuna kontra rabies.

Alayon ani, gilimod ni Culas ang migawas nga taho nga hangtud 50 ra ka kliyente ang ilang ma-akumodar matag adlaw apan ang kamatuoran mukabat sa 500 ka tawo matag-adlaw.

RadyoMaN Joel Viray