Davao City – Giklaro karon ni Davao City First District Councilor Mabel Sunga-Acosta nga dili nila tuyo ang paghikaw sa kagawasan sa pagpadayag ug panagtapok sa katawhan sama sa rally sa pagpasar sa ordinansa nga hugot nang magdili sa mga aktibidad nga mag-okupar unya sa mga kadalanan sama sa lihuk-protesta sa mga militanteng pundok.
Gisugilon ni Acosta, chairperson sa Peace and Order Committee nga iyang gi-respeto ang katungod sa tanan sa pagsinggit sa ilang yangungo batok sa kagamhanan ug wala kiniy tinguha sa paghukas ning maong kahigayunan dihang ilang gipanday ang maong ordinansa.
Gibungat sa konsehala ang iyang pamahayag aron alkontrahon ang Karapatan-Southern Mindanao Region pinaagi sa Secretary General nga si Jay Apiag kinsa mialma sa ordinansa kay pagpatay matud pa kini sa kagawasan sa pagpadayag sa katawhan.
Dugang ni Acosta, gawasnon gihapon ang tanan kun mga indibidwal nga makalusad og protesta basta daplin lang sa kalsada ug dili tunga sa dalan aron dili maghuot ang trapiko ug makahasol sa riding public.
Gilimod ni Acosta ang pasangil sa pipila ka mga militante nga gituyo pagmugna ang ordinansa aron ligsan ug banggaon sila nga alang kanila usa ka matang sa kalapasan sa tawhanong katungod.
Giingon sa konsehala nga mismo ang Presidential Security Group ang naghangyo sa iyang komitiba nga kun mahimo, sirad-an ang dalan sa Panacanang sa bisan unsa nga aktibidad sama sa lihuk-protesta sanglit disturbo kaayo sa mga kalihukan sa pamuno-nasud.
Gawas niini, dili na usab buot ni Acosta nga masubli ang nahitabo sa Panacan ug Lasang diin gibabagan sa mga pulahang militante nga nagresulta sa pipila ka oras nga pagkatanggong sa trapiko sa libuan ka mga motorista ug pagkalugi sa ekonomiya sa dakbayan.
Ubos sa ordinansa, ang si bisan kinsang masakpang makalapas niini pahamtangan og P5,000 nga multa ug pagka-preso sulod sa unom ka bulan hangtud sa usa ka tuig.
RadyoMaN Joel Viray
