Davao City – Gikalipay ni Davao City Mayor Inday Sara Duterte-Carpio ang pag-apruba sa Anti-road obstruction ordinance nga nagdili sa mga grupo sama sa mga militante nga makapahigayon og lihok protesta ug pagbarikada sa mga kadalanan sa siyudad sa Dabaw.
Sa pakighinabi sa Davao Media, gibutyag ni Mayor Inday nga ilang gitun-an ang maong ordinansa diin una niining nakita nga magmugna gayud og traffic labi na ang nahitabong lihok-protesta sa may Panacan area ning syudad.
Dugang pa sa presidential daughter nga ang maong pasadong ordinansa dili lamang limitado sa mga area nga sagad magamugna og traffic apan kini ma-aplikar na sa tanang area sa syudad.
Ubos sa ordinansa, ang si bisan kinsang masakpang makalapas niini pahamtangan og P5,000 nga multa ug pagka-preso sulod sa unom ka bulan hangtud sa usa ka tuig.
Kahinumduman nga sa regular session sa konseho niadtong Martes, November 27, 2018, 17 ka konsehal ang miboto pabor sa pagpasa sa ordinansa nga giduso mismo sa Chairman sa Committee on Peace and Order nga si Councilor Mabel Sunga-Acosta.
RadyoMaN Kirby Manzon
