Davao City – Did-an na unya ang mga grupo sama sa mga militante nga makapahigayon og lihok protesta ug magbarikada sa mga kadalanan sa siyudad sa Dabaw karon nga nakalusot na sa ikatulo ug pinal nga pagbasa sa hawanan sa konseho ang ordinansa nga hugot magdili sa pag-ukopar sa kalsada aron makapahigayon og mga aktibidad.
Atol sa regular session sa konseho karong adlawa, 17 ka konsehal ang miboto pabor sa pagpasa sa ordinansa nga giduso mismo sa Chairman sa Committee on Peace and Order nga si Councilor Mabel Sunga-Acosta.
Gikatakda isumite ang maong ordinansa kang Mayor Inday Sara Duterte-Carpio aron mapirmahan ug mamantala gilayon sa mga mantalaan sud sa kinse diyas sa katuyoan nga mahibawo ang publiko labot sa bag-ong ordinansa.
Suma ni Councilor Mabel Sunga-Acosta, ang makasupak sa nasangpit nga ordinansa pagamultahan og singko mil ka pesos o dili ba kaha mabalhog sa presohan sud sa unom ka buwan ngadto na sa usa ka tuig.
Gitin-aw pa ni Acosta, dili tuyo kitilon sa maong ordinansa ang kagawasan sa pagpasibaw ug katungod sa pagtapok sa katawhan inay buot lamang niini masiguro nga dili mahasol ang publiko ug madiskaril ang trapiko sa syudad gikan sa mga rally sa mga militante.
RadyoMaN Joel Viray
