Davao City – Gipaluyuhan karon sa mabagang duot sa katawhan ang bag-ong abiso ug bahad ni Philippine National Police (PNP) director-general Roland ‘Bato’ Dela Rosa nga tapuson na ang illegal gambling sa mosunod nga 15 diyas.
Sa pakighinabi kaniya sa Straight to the Point uban ni Kasamang June Duterte, gitino ni PNP Spokesperson Sr. Supt. Dionardo Carlos nga klaro ang mando sa Chief PNP ngadto sa tanang mga opisyales sa kapulisan nga ipakita sa katawhan nga determinado ang nasud nga pitolon ang iligal nga pasugal kun illegal numbers game sama sa ‘jueteng’ ug uban pa.
Tupad niana, gipasidaan sa PNP chief nga kutob sa regional ug local police officials nga pakyas pagpahunong sa sugal tino gayud nga sipa-on sa pwesto.
Matud ni Carlos, bug-at kini nga tahas apan desidido ang nasudnong kapulisan nga ipakita sa tanan nga may kaligdong kining motapos sa gidili nga binuhatan ilabi na nga usa sa sagad akusasyon mao nga ang pasugal nigara gumikan sa pagpaluyo sa mga taga-gobyerno lakip na ang involvement sa mga men in uniform.
Dugang ni Carlos nga lakip ang ‘last two’ dinhi sa Davao nga i-operate sa kapulisan sanglit unauthorized kini nga klase sa numbers game nga pinasikad sa draw sa mga legalized gambling operations sa nasud sama sa PCSO.
Sa bahin sa mga yanong lungsuranon, sagad sa mga nahinabi sa tulumanon nagtoo nga husto ang direksyon ni Bato apan angay unahon pagpaundang ang mga dagkung mamsa kun financiers.
Ikaduha, nagtoo ang katawhan nga mosalir lamang ang krusada kun maundang usab ang ‘protection racket’ sa kapulisan diin gibasol kini nga usa sa mga dakung rason kun nganong dili mapukan ang pasugal sanglit adunay mga awtoridad nga nakakwarta sa hilum niini.
Kahinumdoman nga una pa nilingkod ang Duterte administration, gibulgar na ni Dela Rosa nga adunay mga gambling lords niduol kaniya aron sulayan siya pagsuborno bugti ang gawasnon nilang operasyon sa sindikato.
Ang hepe sa kapulisan subling nagpahinumdom nga tupad sa kampanya kontra droga, terorismo, krimen ug korapsyon, tumong ug tinguha usab ni Pres. Rodrigo Duterte nga tuldukan na ang illegal gambling sa nasud nga padayong nagbiktima sa milyon-milyon ka mga Pilipinong na-ungo sa ‘game of chance’ inay nga maningkamot ug manarbaho nga tinarong.
Kasamang June Duterte
