Davao City – Suportado sa Davao City Council Committee on Peace and Public Safety ang sugyot-balaudnon nga pata-as ang silot kun multa sa mga tawo nga mamandal sa pampubliko ug pribado nga mga gambalay.
Sumala ni Committee Chairperson Councilor Mabel Sunga-Acosta. matratar isip kriminal nga binuhatan ang pag-vandal sa pribado ug pampubliko nga lugar hilabi na kun wala kiniy pagtugot.
Sa tan-aw ni Acosta, kun mabug-atan na ang silot hayan wala na’y mangahas mag hugaw hugaw sa mga pampublikong lugar pinaagi sa vandalism tungod sa kalig-on sa basehan sa balaud nga mapanday.
Uyon usab ang konsehala nga wala na’y ihatag nga kunsiderasyon sa mga maghimo niini sama pananglitan sa mga militante nga ga-vandal og mga mensaheng kontra gobyerno diin deretso na silang silotan.
Gipasabot sa opisyal nga migasto og dakung pundo ang lokal nga kagamhanan sa pagpanindot sa tibuok syudad aron attractive kining lantawon apan ginadaot lamang sa pipila sama sa mga militante pinaagi sa ilang mga aksyong vandalism.
Gi-awhag ni Acosta ang mga mahigugmaon sa creative arts nga mananghid sa lokal nga gobyerno kung aduna sila’y ipintura nga nga mga hulagway ug mensahe sa mga pader aron dili makasohan ug masilotan gumikan sa vandalism.
RadyoMaN Joel Viray
