Nagbilin sang anum ka pulis nga patay kag siyam nga pilason ang ginapatihan misencounter sa tunga sang Philippine National Police (PNP) kag Armed Forces of the Philippines (AFP) sa Sitio Lunoy, Barangay San Roque, Sta. Rita, Samar.
Sa inisyal nga report, natabo ang insidente las-9:27 Lunes sang aga kun sa diin nagka-engkwentro ang mga tinawo sang 805th MC, RMFB-8 kag ang mga miyembro sang 87th Infantry Batallion.
Una diri nagpatigayon sang minor combat operations ang mga PNP personnel sa nasambit nga lugar sang ini sila ang gintambangan sang mga elementro sang 87th IB.
Lakip sa mga napatay sanday PO1 Phil Rey Mendigo, PO1 Edwin Ebrado, PO1 Wyndell Normor, PO1 Rowel Reyes, PO1 Julie Escalo kag PO1 Julius Suarez.
Samtang, pilason naman sanday PO1 Romulo Cordero, PO1 Elmer Pan, PO1 Jaime Galoy, PO1 Rey Barbosa, PO1 Jonel Gonzaga, PO1 Cris Angelo Pialogo, PO1 Janmark Adones, PO1 Romel Bagunas kag PO1 Roden Goden.
Sa karon naghimo na ang PNP sang Special Investigation Task Group para maibestigaran ang natabo.
Magapatigayon man sang separado nga imbestigasyon ang militar sa ginapatihan ‘misencounter’. /rcsg
Photo courtesy of Cosette Vallejera
