Ipaidalom sa inspeksyon subong nga semana sang Department of Trade and Industry ukon DTI South Cotabato ang apat ka mga establishemento sa probinsya nga nag-apply para sa safety seal certification program sang ahensya.
Suno kay Warren Jay Nantes Senior Trade Industry Development Specialist Consumer Protection Division sang DTI South Cotabato nga tatlo sa Koronadal City kag isa sa banwa sang Tupi ang ipaidalom nila sa inspeksyon nga ginalakipan sang hardware, supermarket, grocery store kag salon/spa.
Sikyaron sa nasambit nga inspeksyon kon nagasunod ang mga establishemento sa minimum public health standard kag pag-adoptar sang StaySafe.ph digital contact tracing application para sa proteksyon sang konsyumer kag sang tanan.
Pahayag ni Nantes nga mangin balido lamang sa sulod sang anum ka bulan ang safety seal certification nga ihatag sa mga establishemento.
Sakop sang nasambit nga programa sang ahensya ang groceries, supermarkets, membership shopping clubs, convenience stores, construction supply/hardware stores, logistics service providers ukon outlets, barbershops, salons, service and repair shops.
