APL nagduda sa mga resulta sa kaso nga ginapasang-at sa buhatan sa NLRC

General Santos City—Nanawagan si Herbert Demus- Regional Coordinator sa Alliance of Progressive Labor ngadto sa National Labor Relation Commission ( NLRC) nga i-inventory ang mga kaso sa mga trabahante nga gipasaka sa ilang buhatan.

Kini aron matud pa nga matagaan ug pagtagad ang daghang kaso nga natanggong ug nagpaabot ug hustisya gikan sa mga abusadong mga employer sa rehiyon 12.

Gikwestyon usab ni Demus ang mga desisyon sa NLRC sa mga kaso sa daghang mga empleyado tungod kay ubay-ubay matud pa sa mga kaso ang napildi ang kampo sa mga mireklamong mga empleyado.


Gumikan niini nagduda matud pa ang APL sa kridibilidad sa NLRC tungod kay dunay mga sitwasyon nga napildi sa kaso ang empleyado apan pag-abot sa supreme court nabali man ang desisyon.

Duha matud pa ka butang ang posibleng rason ug una mao nga kulang sa kasayoran ang NLRC bahin sa balaud sa panarbaho.
Ikaduha posible matud pang nabayran ang ubang mga nagdumala hinungdan nga napildi sa kaso ang mga empleyado nga gipahimuslan sa mga abusadong kompanya.

Gibatikos usab ni Demos ang Department of Labor and Employment sa wala gihapon paghatag ug aksyon sa mga kompanyang wala nagahatag ug minimum nga suhulan sa ilang mga trabahante.

Matud ni Demus nga duna gani mga mall sa Gensan nga wala gyud nagasubay sa labor standard sa hisgutanang suhulan apan nagpabiling walay aksyon niini ang DOLE.

Duda usab si Demos nga lakas sa DOLE ang nasampit nga mga kompanya hinungdan nga dili masulbadsolbad ang maong problema.

Facebook Comments