General Santos City—sikop sa operatiba sa City Drug Enforcement Unit (CDEU) ang usa ka babaye atol sa ilang gihimong buy-bust operation sa area sa Zone 2, Barangay Buayan, Gensan.
Ang suspek nailhang si Aida Datokaka Pascual, Alias Mother, 50 anyos, residenti sa samang lugar. Alas 6:10 ang takna sa hapon kagahapong adlawa dihang gihimo ang buybust operation batok sa suspek diin napalitan ang nahisgutan didto mismo sa iyang tindahan sa nagpakarong-ingnong miyembro sa CDEU ug (1) ka sachet sa gituohang shabu gamit ang P500.00 nga marked money.
Gawas sa buybust item, nakuhaan pa kini ug laing (1) ka big sachet sa gituohang shabu.
Sumala ni Police Chief Inspector Fermando Manuel, Hepe sa CDEU nga si Pascual ang source ug shabu sa Barangay Buayan ug kabigbit nga Barangay sama nalang sa Brgy. Baluan, Lagao ug Ligaya.
Apan subay sa gihimong surveillance sa kapulisan nasuta nga nagagamit ug mga tricycle drivers ang maong babaye sa pagpamaligya ug shabu gani nakaabot pa sa Barangay Mabuhay ug Barangay San isidro ang ilang operasyon.
Dakong kalampusan alang sa ilang tropa ang pagkasikop sa nahisgutang babaye tungod makonsidera na kining big time pusher sa dakbayan sa Gensan.
