APL: Poverty nagtukmod sa mga OFWs

Davao City – Realidad sa kalisud kun kawad-on ang nag-unang hinungdan nganong daghan sa mga Pilipino ang maagni nga manarbaho sa ubang kanasuran luyo sa mga abuso nga nasinati sa mga OFWs.

Ang kawad-on sa disenteng trabaho ang rason sa padayon nga pagdamgo ug paglupad sa mga Pilipino sa ubang mga nasud taliwala sa peligro ug kagubot sama sa Middle East karon, matud ni Alliance of Progressive Labor (APL) Secretary-General Joshua Mata.

Matud ni Mata, kung aduna ma’y masudlan nga trabaho dinhi sa Pilipinas, ang problema mao nga gawas nga dili ma-regular, gamay ug walay klaro ang mga benepisyo nga ginahatag sa mga kumpanya ngadto sa mga obrero.


Girekognisar ni Mata ang paningkamot sa gobyerno diha sa pagmugna og daghang trabaho apan sagad sa mga trabaho dili haom sa gikinahanglan sa mga Pinoy, busa ang resulta, dili gihapon mabati sa katawhan ang pag-uswag sa ekonomiya sa nasud.

Alang kang Mata, ang bugtong bala sa kagamhanan karon aron maagni ang mga Pilipino nga dili na mag-abroad o dili ba kaha muuli na lamang dinhi sa Pilipinas mao ang pagmugna og daghang trabaho nga sibo sa panginahanglon ug pagtanyag og dakung sweldo ug mga benepisyo sama sa ilang ginadawatan sa mga nasud nga ilang gitrabahoan.

Hangtud dili kana mahatagan og katumanan sa gobyerno, dili gayud mubati og kadismaya ang kadaghanan sa mga Pilipino aron dili na maninguha ug mangandoy nga makatrabaho sa abroad o dili ba kaha mubiya sa mga nasud nga gitrabahoan sa mga OFWs ug sa mga domestic helpers karon.

RadyoMaN Joel Viray

Facebook Comments