Davao City – Gianunsyo sa Social Security System kun SSS nga mamahimo na nga mag apply ang mga pensioners sa Calinan ug Toril areas ning dakbayan alang sa SSS Pension Loan Program (PLP).
Sumala ni Greta Quayle sa SSS Davao atol sa pakighinabi kaniya ni RadyoMaN Misel Miral-Galve sa tulumanong Serbisyong Straight to the Point, mamahimo ng makaadto sa SSS office sa nasangpit nga mga areas ang mga buot mu-apply sa nasangpit nga programa.
Gawas sa Calinan ug Toril, abri na usab sa pagdawat ang opisina sa SSS sa Ilustre ning syudad.
Matud ni Quayle nga di na kinahanglan pa muadto sa main branch sa SSS nga nahimutang sa Bajada dinhi sa dakbayan aron lang mu-apply sa Pension Loan Program.
Ang PLP sumala pa maoy tubag ngadto sa panawagan sa mga senior citizens alang sa baratong loans aron magamit sa ilang panginahanglan sama sa emergency medical expenses.
Tumong sa maong programa mao ang maundang ang gataas nga ihap sa mga insidente sa pensioners nga biktima sa mga loans nga adunay taas nga mga interest rates.
RadyoMaN Renz Barbarona
